ချင်းပြည်နယ် ဟားခါးမြို့၏ မြို့ပြစီမံကိန်း ဧရိယာ (၄၃.၉) စတုရန်းမိုင် တိုးချဲ့ရန် ဆောက်ရွက်နေ

0

ဟားခါးမြို့ မြို့ပြစီမံကိန်း ဧရိယာအဖြစ် (၄၃.၉) စတုရန်းမိုင် တိုးချဲ့သတ်မှတ်နိုင်ရန်အတွက် ပြည်ထောင်စု အစိုးရထံ တင်ပြလျက်ရှိကြောင်း သိရသည်။

၂၀၁၅ ခုနှစ် ဟားခါးမြို့နယ် လူဦးရေ လေးပုံတပုံခန့် သဘာဝဘေးဒဏ်ကြုံတွေ့နေရသည့် ပြည်သူများ အတွက် နေရာချထားရေး လုပ်ငန်းဆောင်ရွက်လိုအပ်လာကြောင်း၊ ဟားခါးမြို့သည် ချင်းပြည်နယ်၏
မြို့တော်ဖြစ်သည်နှင့် အညီ မြို့၏ ဧရိယာတိုးချဲ့ရန်လိုအပ်လာကြောင်း ယမန်နေ့က ကျင်းပပြုလုပ်ခဲ့သည့် လူထုတွေ့ဆုံပွဲတွင် ဟားခါးမြို့ပြဖွံ့ဖြိုးရေးကော်မီတီ ဥက္ကဌလည်းဖြစ်၊ ပြည်နယ် စည်ပင်ဝန်ကြီး ဆလိုင်း အိုက်ဇက်ခင်က ပြောဆိုခဲ့သည်။

ပြည်ထောင်စုအစိုးရက အတည်ပြုပေးပါက မြို့ပြဧရိယာကို သက်ဆိုင်ရာ ပညာရှင်များက တိုင်းတာတွက်ချက် မှုပြုလုပ်မည်ဖြစ်ပြီး ယင်းတိုင်းတာတွက်ချက်မှုအတိုင်း မြို့ပြဖွံ့ဖြိုးရေး လုပ်ငန်းဆောင်ရွက်သွားမည်ဖြစ်ကြောင်း သိရသည်။

“အခုလို (၄၃.၉) စတိုရန်းမိုင်ကို မြို့ဧရိယာအဖြစ် အတည်ပြုလာပြီ ဆိုလို့ရှိရင် မြို့ပြဖွံ့ဖြိုးမှုနှင့် မြေအသုံးချမှု ဘယ်လို လုပ်ဆောင်သွားမလဲဆိုတာကို လုပ်ဆောင်မှာဖြစ်တယ်။ အဲလိုဆောင်ရွက်တဲ့အခါ သက်ဆိုင်ရာ မြို့ပြ ပညာရှင်တွေရဲ့ ရေးဆွဲထားတဲ့ နည်းပညာအရ ဆောင်ရွက်သွားမှာဖြစ်တယ်” ဟု ၀န်ကြီးကဆိုသည်။

မြို့ပြဖွံ့ဖြိုးရေး စီမံကိန်းလုပ်ငန်းဆောင်ရွက်သည့်အခါ မြေယာပိုင်ဆိုင်သူနှင့် မြေယာအသုံးပြုသူများ ဟူ၍နှစ်မျိုးရှိပြီး ၄င်းတို့၏ သဘောထားကို ပြည်နယ်အစိုးရနှင့် ညှိနှိုင်းကာ မြို့ပြဖွံ့ဖြိုးရေးအတွက် မည်ကဲ့သို့ လုပ်ဆောင်မည် ဆိုသည့်အချက်ကိုလည်း လုပ်ဆောင်သွားရန်ရှိကြောင်း သိရသည်။

ဤကဲ့သို့ မြို့ပြစီမံကိန်းဆောင်ရွက်ရာတွင် မြေပိုင်ဆိုင်မှု အထောက်အထားရှိသူများနှင့် အထောက်အထား မရှိပေမဲ့ ဖိုးဖွားစဉ်ဆက်မြေပိုင်ဆိုင်သူများကိုလည်း နစ်နာဆုံးရှုံးမှုမရှိအောင် ညှိနှိုင်းဆောင်ရွက်သွားမည် ဖြစ်ကြောင်း ၀န်ကြီးက ပြောကြားခဲ့သည်။ သို့သော် အစိုးရအဆောက်အဦးများအတွက် မဖြစ်မနေဆောင်ရွက် မည့် လုပ်ငန်းစဉ်အတွက်ကိုတော့ လုပ်ဆောင်သွားရန်ရှိကြောင်းသိရသည်။

“ဒါပေမဲ့ ဟားခါးမြို့ပြ စီမံကိန်းအတွက် မဖြစ်မနေ ဆောင်ရွက်ရမည့် လုပ်ငန်းအတွက်တော့ ရယူမှာဖြစ်တယ်။ ဥပမာ ကားကြီးဝန်းအတွက် ဒီနှစ်အတွင်း ဆောက်လုပ်ဖို့ စီစဉ်နေပါတယ်။ ဒါပေမဲ့ (၄၃.၉) စတုရန်းမိုင် အတည် မပြုခင် ဘာမှလုပ်ဆောင်လို့ မရသေးပါဘူး” ဟု စည်ပင်ဝန်ကြီးက ပြောကြားခဲ့သည်။

ပြည်ထောင်စုအစိုးရအနေဖြင့် (၄၃.၉) စတုရန်းမိုင်ကို ဟားခါးမြို့ပြစီမံကိန်းအတွက် အတည်မပြုမီ ယခင်မြို့ပြ စီမံကိန်းအတွင်း၌ ပါဝင်သည့် (၉၅.၂၅၀) ဧကတွင် လမ်းတိုးချဲ့ဖောက်လုပ်ခြင်း လုပ်ငန်းဆောင်ရွက်သွားရန် ရှိကြောင်း သိရသည်။

Share.

About Author

Leave A Reply

*

code