ချင်းပြည်နယ်ဘတ်ဂျက်မှ ပညာရေးအသုံးစရိတ်ကို သီးသန့်ရေးဆွဲခွဲဝေပေးရန် တောင်းဆို

0

ချင်းပြည်နယ် အစိုးရအနေဖြင့် ချင်းပြည်နယ်ပညာရေး မြင့်တင်ရန်အတွက် ပြည်နယ် ဘတ်ဂျက် မှ ပညာရေးအသုံးစရိတ်ကို သီးသန့်ရေးဆွဲခွဲဝေပေးရန် တောင်းဆိုလိုက်သည်။

ချင်းပညာရေးကွန်ယက်က ၂၀၁၇ ခုနှစ် မေလ (၃၁) ရက်နေ့မှ ဇွန်လ (၁) ရက်နေ့အထိ ကျင်းပပြုလုပ် သည့် ဒုတိယအကြိမ် ချင်းပြည်နယ် ပညာရေးဆိုင်ရာမူဝါဒဆိုင်ရာ ဆွေးနွေးပွဲမှ ချင်းပြည်နယ်၏ ပညာရေးစနစ် ပိုမို တိုးတက်လာရေးအတွက် အခုလိုတောင်းဆိုလိုက်ခြင်းဖြစ်သည်။

ချင်းပြည်နယ်သည် ပြည်ထောင်စု သမ္မတမြန်မာနိုင်ငံတော်အတွင်းရှိ အခြားပြည်နယ်/တိုင်းဒေသကြီးများ နှင့်မတူ ကွဲပြားခြား နားသောကြောင့် ချင်းပြည်နယ်၏ ပညာရေးစနစ်မှာလည်း ချင်းပြည်နယ်နှင့် ကိုက်ညီသော ပညာရေး မူဝါဒ ချမှတ်ရရန်နှင့် ဗဟိုအုပ်ချုပ်စီမံမှုကိုလျှော့ချကာ ကျောင်းအဆင့် ကိုယ်ပိုင်အုပ်ချုပ်စီမံခွင့်ကို အပ်နှင်းပြီး ကျောင်းသားမိဘ၊ ပညာရှင်များနှင့် ကျောင်းဆရာ/မများ ပူးပေါင်းဆောင်ရွက်ခွင့် ရှိရရန် ယင်း ဆွေးနွေးပွဲ သဘောထားထုတ်ပြန်ချက်တွင်ဖေါ်ပြထားသည်။

ချင်းပြည်နယ်ရေမြေဒေသ၊ ယဉ်ကျေးမှုနှင့်ကိုက်ညီသော သင်ရိုးညွှန်းတမ်းများဖြင့် မိခင်ဘာသာစကား အခြေပြု ဘာသာစကားစုံ ပညာရေးစနစ်ကို ကျင့်သုံးရေး၊ စဉ်းစားတွေးခေါ် ဝေဖန်ပိုင်းခြား၊ ဖန်တီးမှု (Creative & Critical Thinking) ကို အားပေးသော သင်ရိုးညွှန်တမ်း၊ သင်ကြားသင်ယူမှုစနစ်၊ အရည်အချင်း စစ်ဆေးခြင်း စနစ်များ ကျင့်သုံးရန်လည်း ထုတ်ပြန်ခဲ့သည်။

ပညာရေးကို မသန်စွမ်းသူများ သာတူညီမျှရရှိနိုင်ရန် ကျောင်းအဆောက်အအုံများ၊ သင်ထောက်ကူပစ္စည်းများ၊ နည်းပညာပံ့ပိုးမှုများ မြင့်တင်လုပ်ဆောင်ရန်နှင့် အစိုးရပညာရေးစနစ်တွင် Home Schooling အပါအ၀င် Alternative Education ကိုအသိအမှတ်ပြု လက်ခံရန် သဘောတူခဲ့ကြသည်။

ပညာရေးဝန်ထမ်းများ ခန့်ထားရေးတွင် ပွင့်လင်းမြင်သာမှုရှိစေရန် သီးခြားလွတ်လပ်သည့် စောင့်ကြည့်ရေး အဖွဲ့ ဖွဲ့စည်းထား ရှိရန်နှင့် ကျောင်းဆရာ/ဆရာမများသည် လွတ်လပ်စွာ ပညာသင်ယူခွင့်၊ဘာသာရပ် ရွေးချယ် သင်ကြားခွင့်၊ ဂုဏ်သိက္ခာနှင့် ညီသော လစာနှင့်ခံစားခွင့်၊ အသင်းအဖွဲ့များဖွဲ့စည်းခွင့်နှင့် ပါဝင်ခွင့်များ ရရှိစေရန်လည်း ၄င်းတို့၏ သဘောထားထုတ်ပြန်ချက်တွင် ဖေါ်ပြထားသည်။

အထူးသဖြင့် ပလက်ဝမြို့နယ်၏ တက္ကသိုလ်ဝင်တန်း စာမေးပွဲအဖြေလွှာစစ်ဆေးခြင်းနှင့် အခြားကိစ္စအဝဝကို ချင်းပြည်နယ်ရှိ အခြားမြို့နယ်များနည်းတူ တစ်နေရာတည်းတွင် စီမံဆောင်ရွက်ရန်လည်း ပြည်နယ်အစိုးရကို တိုက်တွန်းထားသည်။

ဆွေးနွေးပွဲတွင် ချင်းပြည်နယ်ရှိ မြို့နယ်အသီးသီးမှ ပညာရေးကဏ္ဍတွင် တက်ကြွစွာ လုပ်ဆောင်နေသည့် ကိုယ်စားလှယ်များ၊ အထူးဖိတ်ကြားထားသော ပညာရှင်များ စုစုပေါင်း (၁၃၀)ဦး တက်ရောက် ဆွေးနွေးခဲ့ကြပါ သည်။

ချင်းပညာရေးကွန်ယက်သည် ပြည်သူလူထုမှ ပညာရေးဆိုင်ရာ ပိုမို ပါဝင် ဆွေးနွေးလာနိုင်ရန်၊ ၂၀၁၄ ခုနှစ် နိုဝင်ဘာလတွင်လည်း ပညာရေးဆိုင်ရာ ဆွေးနွေးပွဲ ကျင်းပပြုလုပ်ခဲ့ပြီးဖြစ် သည်။

Share.

About Author

Leave A Reply

*

code